Мектеп бітіруші түлектерді «Қандай мамандықты таңдасам?», «Қазіргі еңбек нарығында қандай мамандықтар сұранысқа ие?» деген түрлі сауалдар мазалайды. Осы сұраққа жауап беру мақсатында өңірде алғаш рет «Grant Fest» білім беру орталығы Қазақстанның жетекші жоғары оқу орындарын Өскеменде тоғыстырып, ауқымды фестиваль өткізді.
«Grant Fest» – жоғары оқу орындарының ең ауқымды білім беру фестивалі. Шараға қатысушылар білім ордалары мен мамандықтар туралы толық ақпарат алып қана қоймай, университет өкілдеріне сауалдарын қойып, ақыл-кеңес алды.
«Grant» білім беру орталығының басшысы Құндыз Мұратқызының айтуынша, шараның мақсаты– оқушыларға жоғары білімге қол жеткізуді жеңілдету, саналы таңдау жасауға көмектесу. Білім беру саласындағы соңғы мүмкіндіктермен таныстыру.
Фестиваль барысында еліміздің жетекші жоғары оқу орындары, соның ішінде басқа қалалардан келген университеттер де өздерінің білім беру бағдарламаларымен таныстырды. Олардың қатарында Л.Н.Гумилев атындағы Еуразия ұлттық университеті, Turan-Astana университеті, ІІМ Б.Бейсенов атындағы Қарағанды академиясы, Семей медицина университеті және басқа да жоғары оқу орындары бар.
Шарада жоғары оқу орындарының көрмесі өтті. Артынша мазмұнды конференциямен жалғасып, түлектер арасында бағалы сыйлықтар ойнатылды.